Lagomau se ‘Purinisese’ Samoa i mauga o Fiti | American Samoa

PASEFIKA

I le tausaga e 2014, na liutofaga mai ai ni tagata faigaluega se to’aono mai i le atu Solomona ua loa ona lagomau i luga o mauga i le motu o Nawi, i le Fagaloa o Savusavu i Fiti.  

O se sauniga aloaia sa alo atu iai le aiga o Miller mai i Nukunuve, lea na auai atu ai ma sui malu o le malo o Fiti, a’o  liutofaga ivi o i latou ia e to’aono, lea na fa’amautu i Fiti i le va o le 1864 ma le 1911.

Ma na ripotia mai ai foi le mauaina o fagu ‘ava malosi, o se okeni feula, o fao o se pusa maliu faapea ma nisi o vaega o pusa maliu.

E tusa ai ma se ripoti mai i le Fiji Times, i le aso Faraile, Iuni 27, 2014, sa ta’ua ai le liutofaga o nei tino malu ina ia fa’avanoa le fanua i luga o mauga i Nawi, mo le faatuina o se faletalimalo.

O tino malu uma lava sa i lea motu mo le 180 tausaga, sa liutofaga uma i le motu o Nukunuve.

Ae peitai, o lo’o lagomau ai pea i luga o se tasi o mauga pito sili ona maualuga i Nawi, ia se tina o lo’o iai se talitonuga, e sau mai i aiga tupu i Samoa ma o lona igoa valaau, o Mounga.  E o’o mai le aso, e le o tago iai se tasi i lea tu’ugamau ma e tau le to’atele nisi o tagata o Fiti, e latou te silafia lea tulaga.

Ae e tusa ai ma tala fa’asolopito, o lo’o ta’ua ai e faapea, o Mounga sa sosola mai ma se tamaloa palagi e suafa ia ‘Mr. Miller’, po o ‘William Miller’ po o ‘D.B. Miller’, e pei ona ta’ua i tala tu’u gutu, lea o lo’o ta’ua ai foi faapea, o se auuso nei alii.  Ae na sosola mai Mounga ma ‘Miller’ ma faamautu i Fiti, lea e tupuga mai ai le aiga o Miller lea o lo’o i Fiti.

E tusa ai ma se faamatalaga i totonu o fa’amaumauga a le aiga o Miller (lea e mafai ona maua i luga o le initeneti – www.geni.com), o le tamaitai o Mounga, e sau mai i aiga tau tupu, ma o lona suafa atoa o Aheamauga Lalomauga Mona Miller (po o Maloka), le to’alua o Daniel Bathe Miller, o se seila na o la fa’auo ma o la sosola ese mai ai, mai i Samoa ma folau atu i Sami i Saute.

O lo’o ta’ua foi i totonu o tala’aga a le aiga ‘Miller’, o le alii o Daniel sa soifua mai o ia i totonu o Ovalau, Levuka i le 1816.

O se tala sa lomia i le Fiji Times ia Tesema 16, 2019, o lo’o ta’ua ai le iai o se uso a Daniel ma sa faimalaga mai lo latou aiga mai i le a’ai o Bathe, i Egelani.  Ma o le auuso lea, o le ulu’i ‘Millers’ i totonu o Fiti.  O lo’o iai se talitonuga na o ‘ese’ese ia le auuso i Levuka ma fa’amautu i vaega ‘ese’ese o Fiti.

O se tasi o le auuso lea, na malaga mai i Upolu, Samoa ma fa’auo atu ai i se tamaitai mai i se aiga tau tupu.

E pei ona ta’ua i le ripoti a le Fiti Times, na silafia e Mounga ia tu ma aganu’u a ona tagata ma na ia silafia lelei, e le taliaina e lona aiga le la faaipoipoga ma se alii mai i atunu’u ‘ese, o lea na tu’ua ai e le tamaitai lona aiga ma lona nu’u ma o la malaga fa’atasi atu ma le seila lea ua alofa iai, ma fa’amautu i Fiti.

O lo’o ta’ua foi i totonu o fa’amaumauga a le aiga o Miller, i luga o upega tafa’ilagi (www.geni.com), sa soifua mai Mounga pe a ma le 1820 i le afioaga o Fasitootai, i Upolu i Samoa.  Ma e to’alua sa la fanau tama ma le alii seila, lea na fa’aigoa o Jim ma William Henry Miller II, faapea ma se la tama teine, na fa’aigoa ia Maunga (Mauna) Miller.

Ma sa ta’ua foi i fa’amaumauga a le aiga a Miller, le maliu o Mounga i Vanua Levu ma lagomau ai i Savusavu, po o le motu o Nawi, lea o lo’o lagomau ai e o’o mai i le taimi nei.

Na ripotia mai foi e le Fiji Times i le 2019, sa faaipoipo atu le tama matua a Mounga ia Adi Filomena Ravuiwai, le alo tamaitai a Ratu Koliloa Ravuiwai, le atalii lona ono a le Tui Cakau, o Ratu Tuikilakila Lalabalavu (Baleinamatau).

Sa toatele sa la fanau ma o se tasi o a la alo tamaitai, o Adi Alisi Miller, lea na faaipoipo atu ia Ratu George Brown Toganivalu o Bau, ma e to’alima se la fanau.

E tusa ai ma seisi vaega o le tala fa’asolopito a lenei aiga, e pei ona ripotia mai e le Sunday Times, sa faaipoipo atu William Miller ia Mounga, mai i le aoga sa Toleafoa ma e to’alua sa la fanau teine, o Serah ma Alice, e ese mai i le la fanau e to’atolu lea o lo’o ta’ua i totonu o fa’amaumauga a le aiga a Miller i luga o le upega tafa’ilagi (www.geni.com).

I se lomiga a le Fiji Times i le tausaga e 2014, sa faamatalaina ai le o’o atu o nisi na fia mana’o e fa’atu ni a latou fale i le motu o Nawi, ma talosagaina ia le aiga o Miller i Savusavu mo se fa’atagana ina ia liutofaga ai tino maliu e ono o lo’o lagomau i lea motu.

Ae peitai, ina ua mae’a ni feutagaiga ma le aiga a Miller, sa fa’amautuina ai le fa’atumauina pea ona lagomau ia Mouga i luga o le mauga i Nawi, e avea ma se mata’aga mo tagata o le a asiasi atu.

Faatasi ai ma se fa’atagana mai i le ‘Nawi Island Marin’, na mafai ona malaga atu nisi o sui o le Sunday Times i le motu o Nawi i le aso Gafua, Aukuso 19, e pu’eina mai ni ata o le tu’ugamau a Mouga, lea o lo’o taoto i le itu i Sisifo o le motu o Nawi ma sa ta’ua e se tasi o le aiga, o le a avea lenei tu’ugamau ma se nofoaga fa’asao, i lalo o le puipuiga o le motu o Nawi.

E fai sina umi ma mamao o le faimalaga e agai atu i le tu’ugamau o Mounga.  E amata i se faigamalaga i luga o se va’a mai i le uafu a Waitui, ona e a’e lea i nisi o mauga, pe a ma le 30 minute le mamao, mai i le nofoaga o lagomau ai Mounga.

Sa faamatalaina e le ta’iala sa ta’ita’iina le faimalaga, o tu’ugamau ia o lo’o i luga o le mauga lea o lo’o taoto ai Mauga, o lo’o iai foi ma lona to’alua ma sa la tama teine, o lo’o iai se talitonuga, na maliu a’o laititi o ia.

Na ta’ua e le pu’eata a le Sunday Times, o Sophie Ralulu, e ui i le mamao ma le faigata o le a’e atu i luga o le mauga ae peitai, o se va’aiga maoa’e pe a taunu’u i le pito I luga o le mauga o lo’o ta’o’oto ai Mounga ma lona to’alua ma si o la alo.

Sa ta’ua Ralulu, o se va’aiga mai i luga e miliona lona tau aemaise ai o lo’o lagomau ai se purinisese Samoa, mo le fa’avavau, ua pei o se tala fa’afagogo.